ਇਹ ਵੀ ਮੈਂ ਤੇ ਉਹ ਵੀ ਮੈਂ
ਕਦੇ ਇਹ ਹੱਥ ਬੰਦਗੀ ਕਰਦੇ
ਮੰਗਣ ਸਭ ਲਈ ਦੁਆਵਾਂ
ਕਦੇ ਅਪਣਾ ਸੁਖ ਅੱਗੇ ਰੱਖਾਂ ,
ਬਾਕੀ ਦੁਨੀਆਂ ਨੂੰ ਭੁੱਲ ਜਾਵਾਂ।
ਇਹ ਵੀ ਮੈਂ ਤੇ ਉਹ ਵੀ ਮੈਂ।
ਕਦੇ ਢੇਰ ਬੱਦਲ ਬਰਸ ਬਰਸ ਥੱਕ ਜਾਵਣ ,
ਫਿਰ ਵੀ ਦਿਲ ਮਾਰੂਥਲ ਪਿਆਸਾ ਰਹਿ ਜਾਵੇ,
ਕਦੇ ਬੂੰਦ ਕੋਈ ਕਿਸੇ ਬਦਲੀ ਦਾ ਅਥਰੂ ,
ਤਪਦੇ ਮਨ ਨੂੰ ਠੰਡ ਵਰਤਾਵੇ ,
ਉਮਰਾਂ ਦੀ ਪਿਆਸ ਬੁਝਾਵੇ।
ਉਮਰਾਂ ਦੀ ਪਿਆਸ ਬੁਝਾਵੇ।
ਇਹ ਵੀ ਮੈਂ ਤੇ ਉਹ ਵੀ ਮੈਂ।
ਕਦੇ ਫ਼ਰੇਬਾਂ ਦੇ ਜਾਲ ਵਿਚ ਫੱਸਿਆ
ਕਿਸੇ ਡੂੰਗੇ ਸੱਚ ਨੂੰ ਖੋਜਾਂ ,
ਕਦੇ ਭਰਮਾਂ ਦੇ ਤਾਣੇ ਬਾਣੇ ਵਿਚ ਫੱਸ ਕੇ
ਬੇਈਮਾਨ ਮੈਂ , ਖੁਦ ਹੀ ਭਰਮ ਹੋ ਜਾਂ।
ਇਹ ਵੀ ਮੈਂ ਤੇ ਉਹ ਵੀ ਮੈਂ।
ਕਦੇ ਲੁਕਾਈ ਮੈਨੂੰ ਪਿਆਰੀ ਲੱਗਦੀ
ਤੇ ਦੁਨਿਆ ਬਹੁਤ ਹਸੀਨ ,
ਕਦੇ ਸੁਪਨਾ ਜਾਣ ਕੇ ਜੱਗ ਨੂੰ ,
ਹੋ ਜਾਵਾਂ ਗ਼ਮਗੀਨ।
ਇਹ ਵੀ ਮੈਂ ਤੇ ਉਹ ਵੀ ਮੈਂ।
-ਬਲਜਿੰਦਰ ਗਿੱਲ
Comments
Post a Comment